- ꫞ ꪣꪱ ꪹꪖꪷꪉ ꪣꪳ꫁ ꪭꪸꪙ ꪬꪮꪣ ꪢ꫁ꪱ ꪻꪐ꪿
- ꪎꪲꪚ ꪹꪊꪸꪒ ꪔ꫁ꪺꪥ ꪜꪲ ꪡ꫁ꪱ ꪁꪲꪉ ꪎ꫁ꪺꪥ ꪨꪰ꪿ꪉ ꪹꪒꪱ
- ꪶꪭ ꫟ ꪎꪸꪉ ꪚ꪿ꪱꪫ ꪎꪱꪫ ꪤꪴ꪿ ꪋꪱꪙ ꪜꪱꪙ ꪹꪚ꫁
- ꪙꪱꪉ ꪊꪰ꪿ꪉ ꪤ꫁ꪮꪉ ꪻꪎ꪿ ꪹꪙ꫁ ꪶꪩꪉ ꪄ꪿ꪺꪉ ꪒꪮꪣ ꪋꪱꪙ
- ꪭꪸꪉ ꪜꪴꪙ ꪜꪱꪙ ꪵꪀ꪿ꪫꪉ ꪼꪙ ꪜꪸ ꪠ꫁ꪱꪥ
- ꪋ꫁ꪮꪣ ꪒꪲ꪿ꪉ ꪹꪔ꫁ꪱ ꪔꪲꪙ ꪑ꫁ꪱꪥ ꪶꪩꪉ ꪄ꪿ꪺꪉ ꪹꪚꪙ ꪶꪣꪙ
- ꪹꪬꪸꪙ ꪨꪱꪥ ꫛ ꪚ꪿ꪱꪫ ꪼꪀ ꪔ꪿ꪮꪥ ꪩꪱꪙ ꪣꪱ ꪹꪭ꫁ꪱ
- ꪻꪠ ꪁꪷ꫁ ꪻꪊ ꪈꪾ꪿ ꪮꪲ꫁ꪙ ꪙꪱꪉ ꪙ꫁ꪮꪉ ꪎꪸꪉ ꪄꪾꪚ ꪕꪸꪣ ꪬꪴ
- ꪨꪱꪥ ꪢꪴ꪿ ꪩꪱꪙ ꪚ꪿ꪱꪫ ꪼꪀ ꪔ꪿ꪱꪉ ꪹꪣꪉ ꪣꪱ ꪹꪭ꫁ꪱ
- ꪻꪠ ꪁꪷ꫁ ꪻꪊ ꪈꪾ꪿ ꪮꪲ꫁ꪙ ꪙꪱꪉ ꪙ꫁ꪮꪉ ꪶꪕ ꪔ꫁ꪱꪙ ꪘꪾ꪿ ꪘꪸ
- ꪹꪬꪸꪙ ꪙꪱꪉ ꪹꪋꪷ ꪄꪾ꪿ ꪜꪸ ꪚ꪿ꪱꪫ ꪣꪳ ꪼꪜ ꪀ꫁ꪽ
- ꪙꪰ꪿ꪉ ꪜ꪿ꪽ ꪠ꫁ꪱꪥ ꪻꪥ ꪥ꫁ꪮꪥ ꪵꪠꪙ ꪚ꪿ꪱꪫ ꪼꪜ ꪁꪴꪉ
- ꪤꪮꪀ ꪠꪴꪉ ꪝꪳꪉ ꪚ꪿ꪱꪫ ꪎꪱꪫ ꪹꪥꪸꪒ ꪶꪭꪥ ꪙꪱꪉ ꪙ꫁ꪮꪉ
- ꪹꪝ꪿ ꪵꪮ꪿ ꪎꪳ꪿ ꪹꪚꪷ꪿ꪉ ꪻꪊ ꪕ꫁ꪮꪉ ꪙꪱꪉ ꪣꪰꪀ ꫛ ꪻꪒ
- ꪏꪸꪒ ꪕꪷ꪿ ꪻꪙ ꪻꪊ ꪙꪱꪉ ꪹꪚ꪿ꪱ ꪹꪎꪉ ꪹꪝ꪿ ꪹꪭꪸ ꪔꪱ ꪀꪸ꫁ꪫ
- ꪙꪱꪉ ꪁꪷ꫁ ꪊꪲꪉ ꪹꪚ꪿ꪱ ꪮꪲ꫁ꪙ ꪤꪸꪫ ꪙꪸ꫁ꪫ ꪩꪸꪙ ꪀ꪿ꪱꪫ ꪬꪱ ꪹꪭꪙ
- ꪀꪱꪥ ꪅꪱꪫ ꪉꪲꪙ ꪖꪳꪀ ꪼꪒ ꪵꪜꪀ ꫛ ꪣꪱ ꪄꪳ꫁ꪙ
- ꪙꪱꪉ ꪊꪰ꪿ꪉ ꪉꪫꪱꪀ ꪔ꪿ꪱꪫ ꪘ꫁ꪱ ꪵꪩ ꪵꪕ꫁ ꪹꪬꪸꪙ ꪝꪲ꪿ ꪁꪾ ꪶꪒꪥ
- ꪎꪱꪥ ꪔꪱ ꪩꪸꪙ ꪘ꪿ꪺꪉ ꪀꪽ ꪣ꪿ꪺꪙ ꪹꪣꪷꪉ ꪀꪺꪉ ꪕ꫁ꪮꪉ
- ꪨ꫁ꪱ ꪙꪱꪉ ꪙ꫁ꪮꪉ ꪹꪮꪱ ꪔꪰ꪿ꪉ ꪣꪱ ꪶꪜꪉ
- ꪁꪾ ꪶꪒꪥ ꪶꪏꪉ ꪤꪴ꪿ ꪊꪾ ꪵꪎ꪿ ꪹꪏꪥ ꪶꪕ ꪔ꫁ꪱꪙ:
- “ꪨ꫁ꪱ ꪙꪱꪉ ꪙ꫁ꪮꪉ ꪖꪺꪉ ꪚꪮꪀ ꪒꪱꪉ ꪼꪄ ꪋꪱꪥ ꪹꪭꪷꪥ
- ꪝꪲ꪿ ꪁꪷ꫁ ꪼꪜ ꪨꪱꪥ ꪚ꫁ꪱꪙ ꪜꪴꪙ ꪩꪱꪙ ꪫ꫁ꪱꪙ ꪎꪾ꪿
- ꪹꪭꪸ ꪈꪾ꪿ ꪼꪒ꫁ ꪩꪺꪉ ꪋꪴ꫁ ꪣꪱ ꪎꪴ꪿ ꪄꪷ ꪵꪙꪙ
- ꪋꪴ꪿ ꪹꪋꪷ ꪉꪲꪙ ꪹꪚ꪿ꪱ ꪪꪱꪙ ꪎ꪿ꪱꪉ ꪵꪮꪙ ꪀꪺꪉ ꪕ꫁ꪮꪉ
- ꪹꪝ꪿ ꪹꪭꪸ ꪼꪒ꫁ ꪜꪮꪉ ꪙ꫁ꪮꪉ ꪠꪴ꫁ ꪭꪰꪀ ꪭꪸꪙ ꪬꪮꪣ ꪭꪱ ꪙꪱ
- ꪯꪱꪥ ꪊꪰ꪿ꪉ ꪤꪮꪣ ꪹꪮꪱ ꪼꪫ꫁ ꪩꪺꪉ ꪹꪎꪉ ꪀꪺꪉ ꪶꪢ꪿ꪀ
- ꪼꪅ꫁ ꪙꪲ꫁ ꪡ꫁ꪱ ꪶꪠ꪿ꪀ ꪻꪬ꫁ ꪶꪎ꪿ ꪝꪷ꫁ ꪵꪀꪣ ꪘ꫁ꪱ ꪼꪀ꪿ ꪄꪽ ꪒꪲ ꪵꪩ꫁ꪫ”.
- ꪹꪣ꪿ ꪙ꫁ꪽ ꪚꪴꪙ ꪝꪽ ꪙ꫁ꪮꪉ ꪙꪱꪉ ꪬꪮꪣ ꪔ꫁ꪱꪙ ꪔꪮꪚ:
- “ꪎꪨꪱꪒ ꪘ꫁ꪱ ꪹꪕ꪿ ꪙꪲ꫁ ꪹꪬꪸꪙ ꪝꪲ꪿ ꪣꪱ ꪤꪱꪣ
- ꪬꪱꪀ ꪫ꪿ꪱ ꪹꪚꪙ ꪬꪱꪥ ꪶꪣꪙ ꪎꪲꪚ ꪎꪱꪣ ꪹꪊ꪿ꪉ ꪯꪱꪥ ꪣꪱ ꪒꪲ꫁ꪙ ꪩꪷ ꪁꪫꪱ
- ꪒꪱꪫ ꪮꪮꪀ ꪤ꫁ꪮꪙ ꪹꪚꪙ ꪋ꫁ꪱꪥ ꪼꪜ ꪬꪸ꪿ꪉ ꪊꪮꪣ ꪝꪴ
- ꪯꪱꪥ ꪀꪴ ꪊꪰ꪿ꪉ ꪤ꪿ꪱꪉ ꪔꪲꪙ ꪠꪲꪒ ꪕꪱꪉ ꪹꪖꪷꪉ ꪝꪲ꫁?
- ꪙ꫁ꪮꪉ ꪮ꪿ꪺꪥ ꪻꪚ꫁ ꪹꪔꪷ꪿ꪀ ꪙꪲ꫁ ꪎꪷ ꪝꪲ꪿ ꪑꪱ ꪹꪊꪸ
- ꪎꪷ ꪙꪰ꪿ꪉ ꪶꪩꪉ ꪔꪰ꪿ꪉ ꪚꪱꪥ ꪜꪱꪀ ꪶꪕ ꪒꪮꪣ ꪙ꫁ꪮꪉ ꪀ꪿ꪮꪙ ꪯꪲ”.
- ꪹꪣ꪿ ꪙ꫁ꪽ ꪁꪾ ꪶꪒꪥ ꪤ꫁ꪮꪙ ꪹꪣꪷꪉ ꪻꪊ ꪹꪏꪱ ꪙꪰ꪿ꪉ
- ꪋ꪿ꪽ ꪵꪜꪀ ꪶꪒꪥ ꪶꪙ꫁ꪀ ꪹꪎꪱ ꪁꪴ꫁ꪀ ꪁꪴ ꪮꪲꪉ ꪹꪙꪷ꫁ꪉ
- ꪎꪮꪉ ꪠ꪿ꪱꪥ ꪔ꫁ꪱꪙ ꪩꪺꪉ ꪋꪴ꫁ ꪹꪏꪉ ꪹꪠꪷ꫁ꪉ ꪊꪾꪚ ꪼꪢ
- ꪹꪢꪥ ꪭꪾ ꪥ꫁ꪮꪥ ꪊꪮꪣ ꪹꪄꪱ ꪣꪰꪀ ꪵꪬ꪿ꪉ
- ꪄꪮꪒ ꪜꪱꪀ ꪵꪘ꫁ꪣ ꪹꪑ꪿ꪉ ꪏꪾ꫁ ꪁꪫꪱ ꪹꪀ꫁ꪣ ꪮ꪿ꪮꪣ ꪼꪚ
- ꪏꪸꪒ ꪕꪷ꪿ ꪹꪚꪙ ꪼꪨ ꪹꪄ꫁ꪱ ꪜꪱꪥ ꪝꪴ ꪩꪸꪙ ꪶꪔ꪿ꪀ ꪎꪸ ꪵꪩ꫁ꪫ
- ꪶꪢ꪿ꪀ ꪀ꪿ꪺꪀ ꪀꪸ꫁ꪫ ꪶꪒꪥ ꪕ꫁ꪱꪫ ꪙꪱꪉ ꪙꪱꪒ ꪭꪸꪉ ꪎꪮꪉ
- ꪤꪮꪣ ꪹꪮꪱ ꪼꪫ꫁ ꪀꪺꪉ ꪁꪲꪉ ꪣꪲ ꪹꪚ꫁ ꪹꪣ꪿ ꪻꪒ
- ꪁꪷ꫁ ꪹꪝ꪿ ꪩꪺꪉ ꪭꪰꪀ ꪮꪲ꫁ꪙ ꪖꪳꪀ ꪹꪙ꫁ ꪹꪚ꪿ꪱ ꪵꪚ꪿ꪉ ꪫꪱꪉ ꪵꪄꪙ
- ꪬꪱꪀ ꪫ꪿ꪱ ꪵꪎꪙ ꪵꪣꪉ ꪩꪸꪙ ꪔꪳ꪿ꪙ ꪊꪸꪫ ꪼꪀ꪿ ꪥꪸꪙ ꪄꪽ ꪀ꫁ꪱ ꪵꪩ꫁ꪫ ꪙꪱ
- ꪕ꫁ꪱꪫ ꪊꪰ꪿ꪉ ꪼꪒ꫁ ꪬ꪿ꪱꪉ ꪙ꫁ꪮꪉ ꪁꪳꪙ ꪔ꪿ꪱꪫ ꪬꪱ ꪹꪭꪙ
- ꪭꪸꪙ ꪬꪮꪣ ꪵꪁꪣ ꪻꪙ ꪻꪊ ꪢ꫁ꪮꪣ ꪢꪮꪀ
- ꪵꪩ꫁ꪫ ꪚꪮꪀ ꪻꪬ꫁ ꪝꪲ꪿ ꪕ꫁ꪱꪫ: “ꪑꪱ ꪋꪸꪒ ꪔꪱ ꪼꪨ ꪯꪱꪥ ꪹꪭꪷꪥ
- ꪝꪲ꪿ ꪼꪜ ꪹꪭꪙ ꪒꪾꪚ ꪒꪲ ꪑꪱ ꪣꪲ ꪄꪴ ꪭ꫁ꪱꪥ ꪎꪰꪉ ꪹꪙꪷ
- ꪵꪩ꫁ꪫ ꪢ꪿ꪽ ꪹꪔ꫁ꪱ ꪔꪲꪙ ꪑ꫁ꪱꪥ ꪣꪱ ꪜ꪿ꪮꪉ ꪤꪱꪣ ꪑꪲꪉ
- ꪩꪲꪉ ꪹꪬꪸꪙ ꪎꪱꪫ ꪔ꪿ꪱꪉ ꪹꪣꪉ ꪠꪸꪫ ꪹꪨ꫁ ꪁꪷ꫁ ꪒꪲ
- ꪑꪱ ꪬꪱꪀ ꪔ꫁ꪱꪙ ꪤꪮꪣ ꪙꪸ꫁ꪫ ꪩꪳꪣ ꪹꪣ꪿ ꪎꪮꪉ ꪊꪱꪫ ꪀꪽ ꪹꪙꪷ”
- ꪁꪾ ꪶꪒꪥ ꪜꪱꪫ ꪹꪚ꪿ꪱ ꪄꪲꪙ ꪄꪮꪒ ꪙꪱꪉ ꪀꪾ ꪶꪬ꫁ꪣ
- ꪵꪩ꫁ꪫ ꪚꪲꪒ ꪵꪀ꫁ꪣ ꪚꪱꪥ ꪙꪲ꫁ꪫ ꪔꪱꪉ ꪊꪳ꪿ꪉ ꪩꪱ ꪔꪲꪙ
- ꪭꪮꪒ ꪹꪖꪷꪉ ꪹꪭꪙ ꪊꪰ꪿ꪉ ꪵꪜꪉ ꪹꪎ꪿ ꪡꪱ ꪙꪮꪙ ꪥꪰ꫁ꪉ
- ꪕ꫁ꪱꪫ ꪬꪱꪀ ꪒꪰ꫁ꪉ ꪀꪺꪉ ꪕ꫁ꪮꪉ ꪹꪏꪉ ꪼꪎ꫁ ꪚ꪿ꪱꪉ ꪚꪱ
- ꪁꪷ꫁ ꪹꪝ꪿ ꪵꪙꪙ ꪜꪽ ꪻꪬ꫁ ꪎꪮꪉ ꪕꪱꪉ ꪹꪝ ꪵꪀ꪿ꪫꪙ ꪀꪽ ꪙꪱ
- ꪕ꫁ꪱꪫ ꪬꪱꪀ ꪵꪘ꫁ꪣ ꪻꪊ ꪼꪫ꫁ ꪚꪰꪀ ꪒ꪿ꪱꪙ ꪹꪜꪸꪙ ꪭꪮꪥ
- ꪊꪴꪉ ꪹꪖꪷꪉ ꪵꪝꪉ ꪈꪾ꪿ ꪨꪱꪥ ꪶꪕ꫁ꪀ ꪛꪺꪙ ꪁꪮꪥ ꫟
- ꪁꪮꪉ ꪕꪷ꪿ ꪻꪬ꫁ ꪹꪫꪸꪙ ꪋ꫁ꪮꪥ ꪹꪣ ꪣꪳꪒ ꪎꪸ ꪵꪎꪉ
- ꪕꪸꪫ ꪤꪱꪣ ꪵꪝꪉ ꪠꪸꪒ ꪵꪠꪉ ꪊꪰ꪿ꪉ ꪣꪱꪥ ꪻꪊ ꪎꪸ꫁ꪉ
- ꪹꪋꪷ ꪶꪠ꪿ꪀ ꪹꪄ꫁ꪱ ꪒꪱ ꪹꪝ꫁ ꪹꪩꪷꪉ ꪵꪄꪀ ꪄꪺꪙ ꪹꪉꪱ
- ꪣꪱ ꪙꪰ꪿ꪉ ꪹꪏꪱ ꪮꪲꪚ ꪮꪲ ꪔꪰ꪿ꪉ ꪭꪸꪉ ꪀꪲꪙ ꪘꪰ꫁ꪉ
- ꪕ꫁ꪱꪫ ꪁꪷ꫁ ꪻꪊ ꪶꪢ꪿ꪀ ꪬ꫁ꪮꪥ ꪩꪳ꪿ꪙ ꪏꪰ꫁ꪉ ꪵꪔ꪿ꪉ ꪹꪝꪷ꪿ꪉ ꪏꪱꪉ ꪶꪚꪉ
- ꪶꪀꪉ ꪹꪎꪉ ꪙ꫁ꪮꪉ ꪭꪸꪙ ꪬꪮꪣ ꪁꪷ꫁ ꪶꪄ꪿ꪙ
- ꪙꪱꪉ ꪁꪷ꫁ ꪹꪩꪷꪉ ꪶꪚ꪿ꪙ ꪼꪬ꫁ ꪬꪱ ꪕ꫁ꪱꪫ ꪜꪱꪙ ꪹꪣꪉ ꪕꪳ ꪹꪎꪸꪙ
- ꪹꪬꪸꪙ ꪭꪸꪙ ꪔꪱ ꪶꪔ꪿ꪀ ꪼꪨ ꪵꪣ꪿ ꪵꪝꪉ ꪖꪱꪣ ꪖ꫁ꪮꪥ:
- “ꪹꪊꪸꪚ ꪹꪚ꪿ꪱ ꪼꪎ꫁ ꪹꪩꪒ ꪥ꫁ꪮꪥ ꪏꪳ ꪊꪰ꪿ꪉ ꪹꪨꪉ ꪶꪩꪉ”
- ꪭꪳ ꪫ꪿ꪱ ꪄꪫꪽ ꪩꪴꪀ ꪵꪝꪉ ꪬ꪿ꪱꪉ ꪶꪨꪉ ꪔ꪿ꪱꪉ ꪹꪣꪉ ꪎꪸ ꪹꪙ꫁
- ꪣꪳ ꪁꪳ ꪵꪄ꫁ꪣ ꪹꪨꪉ ꪣ꫁ꪱꪙ ꪵꪣ꪿ ꪬꪱꪀ ꪨꪷ ꪹꪅꪱ
- ꪣꪲ ꪹꪕ꪿ ꪹꪙꪱ ꪄꪫꪽ ꪮ꪿ꪮꪙ ꪋꪸꪒ ꪡꪴꪙ ꪎꪸ ꪬ꫁ꪮꪉ
- ꪹꪚ꪿ꪱ ꪵꪮ꪿ ꪹꪨ꫁ ꪒꪮꪣ ꪛ꫁ꪱꪙ ꪵꪀꪣ ꪄ꪿ꪺꪉ ꪹꪚꪙ ꪶꪣꪙ
- ꪊꪰ꪿ꪉ ꪹꪜꪸꪙ ꪹꪡꪙ ꪶꪢ꪿ꪀ ꪻꪊ ꪹꪚ꪿ꪱ ꪣꪲ ꪵꪭꪉ ꪹꪥ꫁ꪙ
- ꪹꪮꪙ ꪀ꪿ꪱ ꪹꪄ꫁ꪱ ꪜꪱ ꪋꪲ꫁ꪙ ꪤ꫁ꪱꪙ ꪬꪮꪒ ꪩꪮꪙ ꪀꪲꪙ
- ꪬꪱꪀ ꪫ꪿ꪱ ꪩꪺꪉ ꪄꪲꪙ ꪙꪱꪉ ꪤꪴ꪿ ꪒꪮꪣ ꪚꪱ ꪼꪕ ꪶꪒꪥ ꪕ꫁ꪱꪫ
- ꪣꪷ꪿ ꪹꪚ꪿ꪱ ꪬ꫁ꪱꪫ ꪹꪝ꪿ ꪶꪝ꫁ ꪼꪒ꫁ ꪖꪳꪀ ꪁꪫꪱꪣ ꪊꪱ
- ꪙꪮꪙ ꪁꪳꪙ ꪙꪱꪉ ꪵꪄꪀ ꪬꪱ ꪩꪰꪀ ꪋꪱꪉ ꪀꪺꪉ ꪕ꫁ꪮꪉ:
- “ꪣꪱ ꪀ꪿ꪺꪀ ꪬ꫁ꪮꪉ ꪭꪸꪉ ꪙ꫁ꪮꪉ ꪠꪸꪒ ꪵꪠꪉ ꪁꪲꪉ ꪑꪲꪉ ꪼꪩ!
- ꪜꪮꪉ ꪫ꪿ꪱ ꪩꪳꪣ ꪎꪸ ꪑꪲꪉ ꪵꪚ꪿ꪉ ꪼꪜ ꪎꪴ꪿ ꪻꪠ ꪩꪰꪀ ꪙꪮꪙ ꪵꪠꪉ ꪵꪩ꫁ꪫ
- ꪹꪥꪸꪒ ꪚꪱꪚ ꪻꪬ꫁ ꪻꪊ ꪙ꫁ꪮꪉ ꪭꪴꪙ ꪼꪎ꫁ ꪈꪾ꪿ ꪨꪱꪥ ꪏꪲ꫁ꪙ ꪹꪩꪸ?”
- ꪹꪖꪷꪉ ꪹꪣ꪿ ꪁꪳꪙ ꪹꪚꪙ ꪬꪱꪥ ꪭꪴ꪿ꪉ ꪹꪭꪉ ꪀꪺꪉ ꪶꪠ꫁ꪉ
- ꪙꪱꪉ ꪊꪰ꪿ꪉ ꪹꪔ꫁ꪱ ꪁꪴ꪿ ꪹꪮ꫁ꪥ ꪮꪲ꪿ ꪙ꫁ꪮꪉ ꪶꪩꪉ ꪄ꪿ꪺꪉ ꪒꪰꪉ ꪼꪡ
- ꪝꪱ ꪋꪺꪉ ꪼꪙ ꪜ꪿ꪽ ꪬꪽ ꪎꪳꪚ ꪶꪏꪙ ꪔꪱꪣ ꪩꪷ꫁
- ꪩꪸꪙ ꪊꪰ꪿ꪉ ꪼꪒ꫁ ꪊꪺꪚ ꪝꪷ꫁ ꪯꪱꪥ ꪝꪲ꪿ ꪁꪾ ꪶꪒꪥ
- ꪙꪱꪉ ꪊꪰ꪿ꪉ ꪎꪲ ꪎꪱ ꪩꪰꪀ ꪔ꪿ꪱꪫ ꪶꪭꪥ ꪬꪱ ꪤ꫁ꪱꪫ
- ꪕ꫁ꪱꪫ ꪁꪷ꫁ ꪭꪴ꫁ ꪊꪰꪀ ꪘꪰ꫁ꪉ ꪙꪱꪉ ꪙ꫁ꪮꪉ ꪜꪲ꫁ꪙ ꪎꪾꪚ ꪁꪳꪙ ꪨꪰꪉ
- ꪭꪮꪒ ꪹꪖꪷꪉ ꪋꪱꪙ ꪘꪾ꪿ ꪘꪺ ꪮ꪿ꪮꪙ ꪙꪺꪙ ꪹꪀꪱ ꪀ꫁ꪺ.
- ꪶꪒꪥ ꪊꪰ꪿ꪉ ꪔ꫁ꪱꪙ ꪎꪴ꪿ ꪙ꫁ꪮꪉ ꪋꪴ꫁ ꪜ꫁ꪮꪥ ꪭꪸꪙ ꪬꪮꪣ:
- “ꪹꪝ ꪶꪎꪣ ꪝꪷ ꪬ꪿ꪱꪉ ꪮꪺꪙ ꪎꪲ꪿ ꪹꪫꪸꪙ ꪜꪱꪥ ꪬ꫁ꪱ ꪶꪖꪥ ꪙꪱ
- ꪝꪲ꪿ ꪬꪱꪀ ꪼꪒ꫁ ꪹꪣꪱ ꪩ꫁ꪱ ꪹꪏꪉ ꪼꪎ꫁ ꪄꪱꪒ ꪀꪱꪉ
- ꪹꪝ꪿ ꪫꪸꪀ ꪹꪭꪙ ꪖꪳꪀ ꪜꪴꪙ ꪊꪰ꪿ꪉ ꪭꪱꪣ ꪎꪸ ꪙ꫁ꪮꪉ
- ꪩꪺꪉ ꪭꪰꪀ ꪨ꫁ꪱ ꪮꪺꪙ ꪙ꫁ꪮꪉ ꪔꪱꪉ ꪋꪳ꪿ ꪣꪸ ꪄꪫꪽ ꪵꪩ꫁ꪫ ꪙꪱ
- ꪊꪺꪙ ꪻꪊ ꪨꪱꪥ ꪹꪚ꪿ꪱ ꪹꪬꪸꪙ ꪊꪰꪀ ꪏꪳ ꪤꪴ꪿ ꪼꪒ꫁”
- ꪉꪲꪙ ꪄꪮꪒ ꪔ꫁ꪱꪙ ꪶꪒꪥ ꪕ꫁ꪱꪫ ꪙꪱꪉ ꪎꪮꪒ ꪣꪳ ꪎꪱꪙ
- ꪀꪾ ꪭꪰꪒ ꪙꪱꪉ ꪠ꪿ꪱ ꪣꪳ ꪕꪴ꫁ꪀ ꪙꪲ꫁ꪫ:
- “ꪯꪱꪥ ꪫꪱꪉ ꪙ꫁ꪮꪉ ꪹꪭꪸ ꪹꪖꪷꪉ ꪙ꫁ꪮꪥ ꪮ꫁ꪮꪥ
- ꪬꪱꪀ ꪫ꪿ꪱ ꪵꪜꪀ ꪊꪰꪀ ꪀꪲ꫁ ꪎꪲꪚ ꪭ꫁ꪮꪥ ꪭꪲ ꪶꪁꪚ ꪏꪱꪫ ꪜꪲ
- ꪹꪉꪷ ꪫ꪿ꪱ ꪣꪲ ꫛ ꪑꪺꪙ ꪹꪚ꪿ꪱ ꪒꪲ ꪹꪥꪸꪒ ꪯꪱꪥ ꪫꪱꪉ ꪙ꫁ꪮꪉ
- ꪶꪄ꫁ ꪀꪺꪉ ꪕ꫁ꪮꪉ ꪔꪱ ꪬꪱꪀ ꪶꪋꪣ ꪼꪨ
- ꪹꪝ꪿ ꪹꪎꪉ ꪯꪱꪥ ꪈꪾ꪿ ꪼꪜ ꪏꪴ꫁ꪀ ꪕꪴꪙ ꪭꪴꪙ ꪼꪎ꫁
- ꪵꪣ꪿ ꪊꪰ꪿ꪉ ꪼꪒ꫁ ꪑꪷ ꪑ꫁ꪮꪥ ꪮ꫁ꪮꪙ ꪮ꪿ꪮꪥ ꪹꪩ ꪖꪱꪣ
- ꪹꪉꪷ ꪫ꪿ꪱ ꪁꪲꪉ ꪬ꪿ꪱꪉ ꪶꪨꪉ ꪔ꪿ꪱꪉ ꪹꪣꪉ ꪎꪸ ꪕ꫁ꪱꪫ
- ꪵꪩ꫁ꪫ ꪊꪲ꪿ ꪼꪔ꫁ ꪒꪲ꪿ꪙ ꪡ꫁ꪱꪫ ꪹꪎ꫁ ꪥ꫁ꪺꪉ ꪭꪸꪀ ꪄꪫꪽ ꪶꪨꪉ
- ꪬꪱꪀ ꪫ꪿ꪱ ꪶꪀꪉ ꪹꪎꪉ ꪙ꫁ꪮꪉ ꪭꪸꪙ ꪬꪮꪣ ꪻꪠ ꪎ꪿ꪮꪉ ꪼꪒ꫁ ꪹꪩꪸ
- ꪹꪯꪸꪣ ꪹꪚ꪿ꪱ ꪵꪊ꫁ꪉ ꪀꪺꪉ ꪕ꫁ꪮꪉ ꪮ꫁ꪱꪥ ꪭ꪿ꪱꪫ ꪹꪉꪷ ꪠꪲ
- ꪼꪢ ꪚꪴꪙ ꪒꪲ ꪝꪲ꪿ ꪣꪱ ꪤꪱꪣ ꪙ꫁ꪮꪉ
- ꪥꪸꪙ ꪹꪥꪸꪒ ꪎꪸ꫁ꪉ ꪀꪺꪉ ꪕ꫁ꪮꪉ ꪹꪏ ꪫ꪿ꪱ ꪔꪱꪥ ꪁꪳꪙ”
- “ꪯꪱꪥ ꪹꪭꪷꪥ, ꪮꪽ ꪙꪲ꫁ ꪫꪸꪀ ꪶꪄꪣ ꪭꪳꪙ ꪵꪔ꪿ ꪒꪱꪥ ꪶꪠ꪿ꪀ ꪼꪡ ꪼꪨ ꪙꪾ꫁ ꪎꪸ ꪵꪩ꫁ꪫ
- ꪹꪏ ꪫ꪿ꪱ ꪼꪒ꫁ ꪮꪲ꪿ꪣ ꪹꪄ꫁ꪱ ꪉꪱꪥ ꪹꪝ꫁ ꪣꪱ ꪶꪁꪚ ꪎꪱꪣ ꪵꪩꪉ ꪙ꫁ꪽ ꪙꪱ”.
- ꪉꪲꪙ ꪁꪫꪱꪣ ꪔ꫁ꪱꪙ ꪁꪾ ꪶꪒꪥ ꪡ꫁ꪱꪫ ꪔꪮꪚ:
- “ꪣꪲ ꪹꪕ꪿ ꪙ꫁ꪮꪉ ꪜꪱꪀ ꪵꪄ꫁ꪉ ꪜꪱꪥ ꪩꪲ꫁ꪙ ꪝꪱ ꪝꪲ꪿ ꪮ꪿ꪮꪙ ꪻꪊ
- ꪮꪺꪙ ꪙꪱꪉ ꪊꪲ꪿ ꪹꪚ꪿ꪱ ꪹꪎꪉ ꪹꪝ꪿ ꪭꪱ ꪨꪱꪥ ꪖ꫁ꪮꪥ
- ꪝꪷ꪿ ꪚ꪿ꪱꪫ ꪚ꫁ꪱꪙ ꪻꪒ ꪅ꫁ꪽ ꪹꪭꪙ ꪤ꫁ꪱꪫ ꪶꪊ꪿ꪙ ꪄꪮꪉ
- ꪊꪲ꪿ ꪀꪮꪉ ꪨꪰꪉ ꪹꪥꪸꪒ ꪭꪱ ꪛꪺꪙ ꪕ꫁ꪮꪉ
- ꪎꪷ ꪕꪷ꪿ ꪨ꫁ꪱ ꪣꪲ꪿ꪉ ꪙ꫁ꪮꪉ ꪑꪱ ꪀ꪿ꪱꪥ ꪄꪺ ꪒꪮꪙ
- ꪯꪱꪥ ꪖ꪿ꪮꪙ ꪔꪲꪙ ꪤ꪿ꪱꪉ ꪼꪜ ꪶꪔ꪿ꪀ ꪶꪩꪉ ꪀꪱꪉ ꪙꪾ꫁
- ꪊꪲ꪿ ꪹꪥꪸꪒ ꪻꪬ꫁ ꪼꪕ ꪏꪾ꫁ ꪚ꫁ꪱꪙ ꪀ꪿ꪱꪫ ꪹꪣꪉ ꪬꪺ
- ꪨꪰꪉ ꪣꪱ ꪑꪲꪉ ꪎꪴ꪿ ꪠꪺ ꪵꪚ꪿ꪉ ꪩꪳꪣ ꪎꪸ ꪄ꫁ꪮꪥ
- ꪝꪱ ꪝꪲ꪿ ꪬ꫁ꪮꪥ ꪻꪊ ꪼꪫ꫁ ꪹꪜꪸꪙ ꪄ꪿ꪺꪥ ꪣꪴꪙ ꪶꪔꪙ ꪏꪳ ꪹꪩꪸ”.
- ꪉꪲꪙ ꪶꪒꪥ ꪊꪱ ꪎꪸꪒ ꪶꪄꪣ ꪣꪲ꪿ꪉ ꪙꪱꪉ ꪥꪸꪙ ꪼꪬ꫁
- ꪄꪽ ꪹꪋꪸꪒ ꪘ꫁ꪱ ꪵꪖꪫ ꪥ꫁ꪮꪥ ꪔ꫁ꪱꪙ ꪔꪮꪚ ꪁꪾ ꪶꪒꪥ:
- “ꪯꪱꪥ ꪀꪴ ꪊꪲ꪿ ꪵꪚ꪿ꪉ ꪶꪒꪥ ꪊꪰ꪿ꪉ ꪶꪕ ꪹꪀꪱ ꪄ꫁ꪮꪉ
- ꪝꪲ꪿ ꪬꪱꪀ ꪔ꫁ꪱꪙ ꪹꪥꪸꪒ ꪙ꫁ꪮꪉ ꪔꪱ ꪚ꪿ꪱ ꪼꪨ ꪩꪲꪙ
- ꪹꪚ꪿ꪱ ꪹꪬꪸꪙ ꪯꪱꪥ ꪠꪷ꪿ ꪹꪠꪉ ꪙꪰ꪿ꪉ ꪹꪏꪱ ꪉꪲꪙ ꪢ꫁ꪮꪣ
- ꪹꪭꪱ ꪁꪷ꫁ ꪋ꫁ꪮꪣ ꪀꪷ꪿ ꪮꪲ꫁ꪙ ꪹꪥꪸꪒ ꪋꪴ꫁ ꪁꪳꪙ ꪖ꪿ꪮꪉ ꪑꪰꪉ ꪨꪱꪥ
- ꪝꪱꪥ ꪻꪊ ꪙ꫁ꪮꪉ ꪝꪱ ꪹꪜꪸꪙ ꪵꪬ꫁ꪉ ꪬꪮꪒ
- ꪵꪖꪙ ꪎꪮꪒ ꪻꪬ꫁ ꪹꪀꪱ ꪩꪲ꫁ꪫ ꪹꪚ꪿ꪱ ꪨꪷ꪿ ꪜꪽ ꪣꪱ”
- ꪩꪺꪉ ꪹꪎꪉ ꪭꪱ ꪊꪾꪚ ꪘꪸꪫ ꪶꪢ꪿ꪀ ꪁꪲꪉ ꪶꪒꪥ ꪕ꫁ꪱꪫ
- ꪋꪴ꫁ ꪭꪰꪀ ꪮ꫁ꪺ ꪘꪸꪫ ꪙ꫁ꪱꪫ ꪜꪱꪙ ꪨꪷ꪿ ꪁꪲꪉ ꪒꪸꪫ
- ꪊꪲꪉ ꪹꪚ꪿ꪱ ꪻꪠ ꪮ꪿ꪮꪥ ꪵꪩ ꪪꪱꪙ ꪮ꫁ꪮꪥ
- ꪣꪱ ꪝꪲ꫁ꪀ ꪄ꫁ꪮꪙ ꪻꪊ ꪕ꫁ꪱꪫ ꪩꪳꪣ ꪈꪸ꫁ ꪚ꪿ꪱꪫ ꪎꪱꪫ
- ꪹꪉ꪿ꪙ ꪫ꪿ꪱ ꪑꪰꪉ ꪣꪲ ꪹꪚꪙ ꪵꪀ꪿ꪉ ꪒꪱꪫ ꪭꪴ꪿ꪉ ꪹꪭꪉ ꪅꪺꪉ ꪡ꫁ꪱ
- ꪑꪰꪉ ꪕꪴ꫁ꪀ ꪘ꫁ꪱ ꪜ꪿ꪱ ꪼꪣ꫁ ꪹꪕꪸꪉ ꪘ꪿ꪺꪥ ꪒꪲꪙ ꪶꪣꪙ
- ꪶꪠꪙ ꪨꪺꪉ ꪹꪕꪸꪉ ꪵꪒꪒ ꪵꪄꪉ ꪣꪳꪒ ꪣꪺ ꪚꪰꪉ ꪀ꫁ꪽ
- ꪙꪾ꫁ ꪹꪚ꪿ꪱ ꪵꪬ꫁ꪉ ꪹꪁꪷꪒ ꪁ꫁ꪱꪉ ꪉꪺꪣ ꪎꪴ꫁ꪣ ꪑꪰꪉ ꪜꪱ
- ꪑꪲꪉ ꪁꪷ꫁ ꪹꪚ꪿ꪱ ꪜꪱꪀ ꪁꪫꪱꪣ ꪼꪫ꫁ ꪹꪥꪸꪒ ꪋꪴ꫁ ꪻꪠ ꪙꪱ
- ꪭꪴ꫁ ꪕꪷ꪿ ꪵꪘ꫁ꪙ ꪀꪾꪚ ꪕ꫁ꪱꪫ ꪶꪔ꫁ꪙ ꪝꪲ꪿ ꫛ ꪒꪸꪫ ꪶꪖꪥ ꪙꪱ
- ꪋꪳ꪿ ꪫ꪿ꪱ ꪯꪱꪥ ꪫꪱꪉ ꪙ꫁ꪮꪉ ꪥꪸꪙ ꪠꪸ꫁ꪫ ꪼꪜ ꪮꪳ꪿ꪙ
- ꪙ꫁ꪮꪉ ꪁꪷ꫁ ꪊꪲ꪿ ꪤꪴ꪿ ꪬ꫁ꪮꪉ ꪭꪱꪒ ꪭ꫁ꪱꪙ ꪙꪮꪙ ꪁꪲꪀ ꪔꪱꪉ ꪯꪱꪥ
- ꪔꪱꪥ ꪹꪜꪸꪙ ꪠꪲ ꪒ꪿ꪺꪙ ꪹꪣ ꪹꪣꪉ ꪡ꫁ꪱ
- ꪨ꫁ꪱ ꪊꪲ꪿ ꪹꪥ꫁ꪙ ꪵꪔ꫁ꪉ ꪼꪀ꪿ ꪙꪱ ꪒꪮꪙ
- ꪹꪣ ꪕꪮꪒ ꪁꪮꪙ ꪒꪮꪣ ꪎꪱꪫ ꪤꪴ꪿ ꪭꪮꪙ ꪙꪱ ꪵꪩ꫁ꪉ
- ꪣꪰꪀ ꪵꪬ꪿ꪉ ꪻꪬ꫁ ꪹꪎ꪿ꪱ ꪹꪫ꫁ꪱ ꪎꪱꪫ ꪹꪖ꫁ꪱ ꪹꪚ꪿ꪱ ꪠꪺ ꪶꪖꪥ ꪙꪱ!”
- ꪙꪱꪉ ꪁꪷ꫁ ꪹꪕꪸꪉ ꪊꪱ ꪔꪱ ꪨꪰ꪿ꪉ ꪡꪱꪥ ꪵꪖꪫ ꪥ꫁ꪮꪥ
- ꪶꪒꪥ ꪊꪰ꪿ꪉ ꪮ꫁ꪮꪙ ꪮ꪿ꪮꪥ ꪙ꫁ꪮꪥ ꪻꪬ꫁ ꪋꪳ꪿ꪣ ꪣꪱꪥ ꪒꪲ:
- “ꪊꪲ꪿ ꪶꪕ ꪔ꫁ꪱꪙ ꪭꪮꪒ ꪠꪲ ꪏꪸꪒ ꪶꪎ꪿ ꪎꪰꪉ ꪹꪩꪸ
- ꪫꪸꪀ ꪀ꪿ꪺꪀ ꪶꪮ꫁ ꪹꪥꪸꪒ ꪋꪴ꫁ ꪑꪱ ꪬꪱꪀ ꪛꪺꪙ ꪨꪱꪥ ꪙꪱꪉ ꪹꪭꪷꪥ
- ꪯꪱꪥ ꪀꪱꪥ ꪻꪊ ꪠꪲꪒ ꪁꪫꪱꪣ ꪶꪨꪉ ꪖ꫁ꪮꪥ ꪁꪷ꫁ ꪒꪲ
- ꪊꪲꪉ ꪬ꪿ꪮꪙ ꪻꪬ꫁ ꪫꪸꪀ ꪋꪴ꫁ ꪹꪭꪱ ꪀ꫁ꪺ ꪀꪾꪚ ꪒꪲꪙ
- ꪵꪔ꪿ ꪫ꪿ꪱ ꪑꪰꪉ ꪹꪎꪉ ꪀꪽ ꪚꪴꪒ ꪢꪲꪙ ꪁ꪿ꪮꪥ ꪕꪾ ꪹꪖꪷꪉ ꪹꪙ꫁
- ꪑꪱ ꪬꪱꪀ ꪖꪲ꫁ꪣ ꪫꪱꪉ ꪼꪫ꫁ ꪹꪏꪉ ꪜ꪿ꪱ ꪹꪄꪱ ꪋꪱ
- ꪹꪩꪷꪉ ꪼꪜ ꪣꪱ ꪠꪱꪒ ꪖꪱꪉ ꪹꪥ꪿ꪉ ꪹꪏꪉ ꪎꪺꪙ ꪮ꫁ꪮꪥ ꪙ꫁ꪽ ꪙꪱ”
- ꪕ꫁ꪱꪫ ꪔꪷ꪿ ꪔ꫁ꪱꪙ ꪎꪴ꪿ ꪙ꫁ꪮꪥ ꪵꪩ꫁ꪫ ꪄꪾ꪿ ꪤꪸꪫ ꪣꪳ
- ꪕꪮꪒ ꪹꪮꪱ ꪵꪝꪉ ꪮꪲꪚ ꪮꪲ ꪵꪜ꪿ꪣ ꪭꪸꪉ ꪵꪠꪉ ꪵꪀ꫁ꪣ.
- ꪶꪕ꫁ꪀ ꪕꪷ꪿ ꪹꪚꪙ ꪬꪱꪀ ꪹꪔ꫁ꪱ ꪀꪱꪥ ꪡ꫁ꪱꪫ ꪹꪣ ꪣꪳꪒ ꪎꪸ ꪵꪎꪉ
- ꪒꪱꪫ ꪒꪰꪀ ꪹꪣꪉ ꪤꪴ꪿ ꪵꪠꪉ ꪩꪾꪚ ꪝꪳꪉ ꪨꪱꪥ ꪠ꫁ꪱ
- ꪕ꫁ꪱꪫ ꪊꪰ꪿ꪉ ꪼꪒ꫁ ꪎꪰ꪿ꪉ ꪨ꫁ꪱ ꪚꪮꪀ ꪼꪣ꫁ ꪊꪲ꪿ ꪔ꪿ꪱꪫ ꪬꪱ ꪹꪭꪙ
- ꪭꪸꪙ ꪭꪮꪣ ꪹꪁꪸꪣ ꪶꪢ꪿ꪀ ꪻꪊ ꪹꪚ꪿ꪱ ꪏꪳ ꪫꪱꪉ ꪼꪒ꫁
- ꪊꪰꪀ ꪊꪲ꪿ ꪬ꫁ꪱꪣ ꪜꪰꪒ ꪼꪫ꫁ ꪋꪺꪙ ꪭꪴ꪿ꪉ ꪣꪱ ꪖꪮꪉ
- ꪕ꫁ꪱꪫ ꪊꪰ꪿ꪉ ꪜꪮꪉ ꪁꪫꪱꪣ ꪵꪭ꫁ꪙ ꪎꪮꪙ ꪙꪱꪉ ꪁ꪿ꪮꪥ ꪤꪴ꪿:
- “ꪣꪲ ꪹꪕ꪿ ꪣꪳ꫁ ꪹꪚ꪿ꪱ ꪼꪒ꫁ ꪤꪱꪣ ꪙ꫁ꪮꪉ ꪹꪝ꪿ ꪫꪸꪀ ꪹꪭꪙ ꪘꪱ
- ꪑꪱ ꪎꪲ ꪎꪱ ꪭꪸꪀ ꪯꪱꪥ ꪊꪱꪙ ꪕ꫁ꪮꪉ
- ꪙ꫁ꪮꪉ ꪑꪱ ꪼꪬ꫁ ꪬꪮꪒ ꪵꪉ꫁ ꪻꪬ꫁ ꪵꪣ꪿ ꪨꪷ ꪹꪋꪱ ꪵꪨ꪿ ꪹꪙꪷ
- ꪊꪲ꪿ ꪹꪣꪱ ꪵꪣꪫ ꪎ꪿ꪱꪫ ꪬꪱ ꪶꪣꪒ ꪣꪱ ꪹꪎꪸꪙ ꪙ꫁ꪮꪉ
- ꪯꪱꪥ ꪊꪲ꪿ ꪶꪄ꫁ ꪀꪺꪉ ꪕ꫁ꪮꪉ ꪙꪮꪙ ꪙꪰ꪿ꪉ ꪏꪳ ꪹꪜꪸꪙ
- ꪹꪡꪷꪙ ꪤꪸꪉ ꪩꪺꪉ ꪚ꪿ꪱꪫ ꪎꪱꪫ ꪁ꪿ꪮꪥ ꪕꪾ ꪤꪾ ꪶꪬ꫁ꪣ
- ꪩꪲ꫁ꪙ ꪹꪚ꪿ꪱ ꪶꪔ꫁ꪣ ꪕ꪿ꪱꪙ ꪊꪲ꪿ ꪑꪺꪙ ꪻꪊ ꪹꪭꪱ ꪼꪩ”.
- ꪕ꫁ꪱꪫ ꪁꪷ꫁ ꪶꪣ꫁ꪣ ꪁꪫꪱꪣ ꪁꪳꪙ ꪬꪱ ꪤ꫁ꪱꪫ ꪵꪬ꪿ꪉ
- ꪹꪕꪸꪉ ꪑ꪿ꪱꪉ ꪹꪄ꫁ꪱ ꪜ꪿ꪱ ꪼꪣ꫁ ꪹꪕꪸꪉ ꪊꪳ꪿ ꪭꪸꪙ ꪬꪮꪣ
- ꪏꪾ꫁ ꪕꪷ꪿ ꪩꪺꪉ ꪹꪎꪉ ꪤꪮꪣ ꪤꪴ꪿ ꪻꪊ ꪹꪢꪸꪒ ꪣꪺ ꪜꪲ ꪡ꫁ꪱ
- ꪔ꫁ꪺꪥ ꪎꪳꪚ ꪔ꫁ꪺꪥ ꪙꪱꪉ ꪙ꫁ꪮꪉ ꪫꪽ ꪔꪳ꪿ꪣ ꪻꪐ꪿ ꪚꪱꪙ
- ꪜꪴꪙ ꪜꪱꪙ ꪹꪎꪱ ꪣꪲ ꪶꪒꪥ ꪁꪴ꪿ ꪭꪸꪉ ꪹꪀꪱ ꪀ꫁ꪺ ꪵꪩ꫁ꪫ ꪙꪱ
- ꪬꪱꪀ ꪫ꪿ꪱ ꪘ꫁ꪱ ꪄ꪿ꪺꪉ ꪮꪲ꫁ꪙ ꪣ꪿ꪺꪙ ꪣ꫁ꪺ ꪹꪚ꪿ꪱ ꪹꪁꪷꪒ ꪎꪸꪉ ꪼꪙ
- ꪚ꪿ꪱꪫ ꪨꪱꪥ ꪼꪕ ꪵꪮ꪿ꪉ ꪜꪴꪙ ꪕ꪿ꪱꪫ ꪶꪕ ꪭꪳ꫁ꪙ ꫟
- ꪹꪩꪷꪉ ꪜꪱꪀ ꪮꪲ꫁ꪙ ꪎꪴ꪿ ꪙ꫁ꪮꪉ ꪩꪺꪉ ꪈꪸ꫁ ꪚ꪿ꪱꪫ ꪎꪱꪫ
- ꪙꪱꪉ ꪁꪷ꫁ ꪔꪱꪉ ꪠꪷ꪿ ꪒꪱꪫ ꪭꪴ꪿ꪉ ꪹꪭꪉ ꪒꪺꪉ ꪤ꫁ꪮꪙ
- ꪖ꫁ꪱ ꪎꪴ꪿ ꪠ꫁ꪱ ꪶꪎꪣ ꪏ꫁ꪮꪙ ꪵꪠꪉ ꪝꪲ꪿ ꪁꪾ ꪶꪒꪥ ꪶꪖꪥ ꪙꪱ
- ꪁꪷ꫁ ꪹꪝ꪿ ꪩꪺꪉ ꪹꪎꪉ ꪋꪴ꫁ ꪝꪽ ꪹꪠ ꪉꪸ꫁ ꪹꪀ꪿ꪱ
- ꪕ꪿ꪱꪙ ꪭꪰꪀ ꪔ꫁ꪱꪙ ꪜꪱꪀ ꪹꪫ꫁ꪱ ꪩꪮꪙ ꪔꪮꪚ ꪹꪮꪱ ꪹꪩꪸ
- ꪹꪭꪸ ꪶꪜꪉ ꪁꪫꪱꪣ ꪎꪴ꪿ ꪻꪠ ꪹꪥꪸꪒ ꪩꪺꪉ ꪊꪱꪙ ꪕ꫁ꪮꪉ
- ꪫꪸꪀ ꪣꪰꪀ ꪀꪸ꫁ꪫ ꪙꪱꪉ ꪙ꫁ꪮꪉ ꪢ꫁ꪽ ꪹꪀꪷ꪿ꪉ ꪝꪴ ꪠꪱ
- ꪋꪾ꪿ ꪫ꪿ꪱ ꪹꪬꪷꪉ ꪭꪲ ꪔꪱ ꪬ꪿ꪱꪉ ꪵꪩ ꪹꪬꪸꪙ ꪕ꫁ꪱꪫ
- ꪬꪱꪀ ꪫ꪿ꪱ ꪶꪢ꪿ꪀ ꪁꪳ ꪀꪸ꫁ꪫ ꪎꪴ꪿ ꪕ꫁ꪱꪫ ꪜꪱꪙ ꪬꪱꪒ ꪶꪤꪙ ꪡꪮꪉ
- ꪊꪲꪉ ꪹꪚ꪿ꪱ ꪹꪓꪷꪥ ꪜꪽ ꪎꪮꪉ ꪵꪚ꪿ꪉ ꪩꪱ ꪎꪸ ꪼꪒ꫁
- ꪵꪘ꫁ꪣ ꪶꪢ꪿ꪀ ꪼꪫ꫁ ꪋꪴ꪿ ꪄꪮꪒ ꪁꪫꪱꪣ ꪊꪱ
- ꪣꪱ ꪜꪲ ꪙꪲ꫁ ꪭꪸꪙ ꪬꪮꪣ ꪢ꫁ꪱ ꪔꪳ꪿ꪣ
- ꪎꪲꪚ ꪵꪜꪒ ꪔ꫁ꪺꪥ ꪜꪲ ꪡ꫁ꪱ ꪹꪏꪉ ꪚꪮꪀ ꪼꪄ ꪉꪱꪉ
- ꪁꪾ ꪶꪒꪥ ꪵꪩ ꪹꪚꪷ꪿ꪉ ꪹꪬꪸꪙ ꪣꪷ꪿ ꪙꪱꪉ ꪄꪱꪫ ꪎꪸ꫁ꪉ
- ꪏꪾ꫁ ꪔꪳ꪿ꪣ ꪀꪸ꫁ꪫ ꪁꪱꪒ ꪉꪸ꫁ ꪩꪺꪉ ꪣꪰꪀ ꪜꪱꪙ ꪔꪰꪉ
- ꪹꪕꪸꪉ ꪎꪮꪉ ꪕꪱꪉ ꪚ꪿ꪱꪫ ꪎꪱꪫ ꪹꪚ꪿ꪱ ꪩꪱ ꪵꪖꪫ ꪵꪭ꫁ꪙ
- ꪁꪷ꫁ ꪬꪱꪀ ꪵꪘ꫁ꪣ ꪄꪫꪽ ꪼꪫ꫁ ꪀꪺꪉ ꪢꪱꪀ ꪬꪺ ꪻꪊ
- ꪊꪲꪉ ꪹꪚ꪿ꪱ ꪣꪲ ꪹꪋꪷ ꪻꪒ ꪠꪱꪉ ꪁꪫꪱꪣ ꪊꪱꪫ ꪵꪭ꫁ꪙ
- ꪩꪺꪉ ꪔꪸ꪿ꪀ ꪵꪘ꫁ꪙ ꪙꪱꪉ ꪙ꫁ꪮꪉ ꪏꪾ꫁ ꪔꪳ꪿ꪣ ꪵꪕꪙ ꪎꪴꪉ
- ꪚꪱꪙ ꪒꪮꪣ ꪝꪴ ꪊꪴ ꪼꪄ ꪎꪲ꪿ ꪣꪺ ꪀꪱꪥ ꪡ꫁ꪱꪫ
- ꪙꪾꪚ ꪔꪲ꪿ꪉ ꪔ꫁ꪺꪥ ꪚꪱ ꪕ꫁ꪱꪫ ꪭꪳ ꪭꪮꪒ ꪏꪱꪫ ꪜꪲ
- ꪩꪺꪉ ꪹꪎꪉ ꪵꪝꪉ ꪵꪔ꪿ ꪜꪲ ꪨꪷ꪿ ꪵꪙꪙ ꪒꪮꪣ ꪕ꫁ꪱꪫ
- ꪁꪮꪉ ꪕꪷ꪿ ꪻꪬ꫁ ꪫꪽ ꪡ꫁ꪱꪫ ꪭꪸꪉ ꪭ꪿ꪺꪣ ꪢꪮꪙ ꪒꪸꪫ
- ꪹꪚ꪿ꪱ ꪤꪸꪫ ꪣꪳ ꪎꪴ꪿ ꪻꪠ ꪔꪳ꪿ꪣ ꪁꪫꪱꪣ ꪐꪱꪫ ꪐꪴ꫁ꪉ
- ꪕꪴ꫁ꪀ ꪄꪮꪒ ꪖ꫁ꪮꪥ ꪙꪱꪉ ꪙ꫁ꪮꪉ ꪬꪮꪣ ꪎꪰ꪿ꪉ ꪁꪸꪙ ꪹꪀꪱ
- ꪶꪕ꫁ꪀ ꪕꪷ꪿ ꪹꪯꪸꪣ ꪊꪰ꪿ꪉ ꪊꪱ ꪎꪴ꪿ ꪙꪱꪉ ꪑꪮꪥ ꫟:
- “ꪙ꫁ꪮꪥ ꪵꪣ꪿ ꪹꪮꪷꪥ ꪹꪜꪸꪙ ꪎꪱꪫ ꪬꪱ ꪹꪭꪙ ꪵꪩ꫁ꪫ ꪨꪷ꫁!
- ꪜꪲ ꪹꪚꪙ ꪼꪜ ꪔꪳ꪿ꪣ ꪵꪕꪙ ꪎꪴꪉ ꪔ꫁ꪺꪥ
- ꪵꪒꪒ ꪎ꪿ꪮꪉ ꪔ꫁ꪮꪉ ꪜꪱ ꪼꪣ꫁ ꪼꪄ ꪹꪭ꪿ ꪵꪣꪉ ꪔꪮꪣ
- ꪼꪋ ꪮꪱꪥ ꪬꪮꪣ ꪶꪙ꫁ꪀ ꪶꪭꪣ ꪚꪲꪙ ꪹꪭ꫁ꪱ
- ꪨꪰꪉ ꪚꪮꪀ ꪹꪎ꫁ꪱ ꪶꪙ꫁ꪀ ꪹꪫꪸ꫁ꪙ ꪵꪣꪉ ꪹꪚ꫁ ꪹꪚ꪿ꪱ ꪔꪮꪣ
- ꪼꪅ꫁ ꪙꪲ꫁ ꪩꪴꪀ ꪵꪝꪉ ꪹꪏꪉ ꪚꪮꪀ ꪼꪄ ꪹꪭ꪿ ꪏꪮꪣ ꪒꪮꪣ ꪀ꫁ꪱꪙ
- ꪚ꪿ꪱꪫ ꪣ꪿ꪺꪙ ꪔ꫁ꪱꪙ ꪶꪭꪣ ꪹꪭ꫁ꪱ ꪣꪮꪙ ꪹꪄ꫁ꪱ ꪎꪴ꪿ ꪎꪮꪉ
- ꪹꪋꪷ ꪹꪖꪷꪉ ꪑꪱꪣ ꪵꪬ꪿ꪫ ꪹꪨꪉ ꪵꪀ꪿ ꪁꪲꪉ ꪶꪔꪙ ꪹꪎ꫁ꪱ
- ꪚ꪿ꪱꪫ ꪹꪚ꪿ꪱ ꪹꪔ꫁ꪱ ꪹꪭꪉ ꪏꪾ꫁ ꪨꪱꪥ ꪖ꫁ꪮꪥ ꪵꪐ꪿ꪉ ꪮꪱꪥ ꪊꪲꪉ ꪩꪱꪥ”
- ꪡꪰꪉ ꪁꪫꪱꪣ ꪊꪱ ꪵꪣ꪿ ꪁꪲꪉ ꪹꪎꪉ ꪉꪸ꫁
- ꪙꪱꪉ ꪊꪰ꪿ꪉ ꪔ꫁ꪱꪙ ꪼꪄ ꪄꪮꪒ ꪒꪮꪣ ꪹꪯꪸꪣ:
- “ꪩꪴꪀ ꪁꪷ꫁ ꪹꪭꪸ ꪹꪎꪉ ꪀꪸ꫁ꪫ ꫛ ꪻꪒ ꪹꪄ꫁ꪱ ꪶꪢ꪿ꪀ
- ꪫꪸꪀ ꪹꪩꪀ ꪮꪲ꫁ꪙ ꪶꪎꪣ ꪏ꫁ꪮꪙ ꪹꪚ꪿ꪱ ꪋꪳ꪿ ꪹꪏꪉ ꪔꪰꪒ ꪁꪱꪙ ꪒꪺ
- ꪹꪮꪱ ꪠꪺ ꪹꪚ꪿ꪱ ꪋꪳ꪿ ꪹꪏꪉ ꪒ꪿ꪱꪉ ꪄꪮꪉ ꪹꪜꪷꪒ ꪫꪱꪉ ꪩꪸꪙ ꪖꪲ꫁ꪣ ꪻꪒ ꪙꪱ”
- ꪹꪯꪸꪣ ꪀꪾꪚ ꪮ꫁ꪱꪥ ꪡꪰꪉ ꪁꪲ꫁ꪫ ꪙꪱꪉ ꪶꪮ꫁ ꪀꪾꪚ ꪜꪮꪉ
- ꪹꪜꪸꪙ ꪄꪮꪉ ꪡꪰꪉ ꪮꪲ꪿ꪙ ꪹꪎꪉ ꪩꪴꪀ ꪵꪝꪉ ꪻꪙ ꪕ꫁ꪮꪉ
- ꪁꪷ꫁ ꪹꪝ꪿ ꪮ꫁ꪮꪣ ꪮ꪿ꪮꪥ ꪙ꫁ꪮꪥ ꪙꪱꪉ ꪣꪰꪀ ꪁꪾ ꪶꪒꪥ
- ꪹꪯꪸꪣ ꪹꪚ꪿ꪱ ꪭꪴ꫁ ꪭ꪿ꪱꪫ ꪶꪕ ꪒꪮꪣ ꪙ꫁ꪮꪥ
- ꪶꪕ꫁ꪥ ꪕꪷ꪿ ꪔ꫁ꪺꪥ ꪀ꪿ꪱꪥ ꪔ꫁ꪺꪥ ꪀꪱꪥ ꪡ꫁ꪱꪫ ꪄꪳ꫁ꪙ ꪔꪳ꪿ꪣ ꪵꪕꪙ ꪶꪊꪙ
- ꪣꪺ ꪘꪱꪫ ꪣꪱ ꪹꪚ꪿ꪱ ꪹꪬꪸꪙ ꪚꪱ ꪼꪕ ꪶꪩꪉ ꪮꪲ꫁ꪙ
- ꪙꪱꪉ ꪬꪱꪀ ꪒꪲ꫁ꪙ ꪭꪴꪙ ꪕ꫁ꪮꪉ ꪜꪱꪙ ꪜꪮꪒ ꪹꪀ ꪤꪾ
- ꪀꪾ ꪻꪊ ꪀꪸ꫁ꪫ ꪁꪾ ꪶꪒꪥ ꪹꪚ꪿ꪱ ꪹꪚ꪿
- ꪹꪏ ꪫ꪿ꪱ ꪹꪄꪸꪣ ꪎꪰꪀ ꪵꪘ꫁ꪙ ꪀꪺꪉ ꪕ꫁ꪮꪉ ꪘꪱꪣ ꪬꪰꪀ ꪁꪱ ꪔꪲꪙ
- ꪩꪺꪉ ꪄꪲꪙ ꪻꪊ ꪶꪮ꪿ꪥ ꪋꪱꪉ ꪙꪱꪉ ꪼꪬ꫁
- ꪀꪸ꫁ꪫ ꪀꪲꪒ ꪼꪎ꫁ ꪎꪴ꪿ ꪕ꫁ꪱꪫ ꪙꪱꪉ ꪬꪱꪀ ꪹꪜꪸꪙ ꪭꪴꪙ
- ꪕꪴꪙ ꪻꪊ ꪙꪱꪉ ꪊꪰ꪿ꪉ ꪄꪸꪙ ꪠꪱꪀ ꪩꪱꪥ ꪎꪳ ꪹꪫ꫁ꪱ
- “ꪎꪷ ꪠꪱꪀ ꪹꪔ꫁ꪱ ꪤꪱꪣ ꪋꪴ꫁ ꪶꪔ꫁ꪙ ꪝꪲ꪿ ꪁꪾ ꪶꪒꪥ
- ꫛ ꪹꪎꪉ ꪙ꫁ꪮꪉ ꪠꪺ ꪝꪱꪉ ꪹꪭꪸ ꪹꪀ꪿ꪥ ꪑꪲꪉ ꪹꪭꪷꪥ
- ꪁꪲꪉ ꪹꪀꪀ ꪒ꫁ꪽ ꪹꪥꪸꪒ ꪋꪴ꫁ ꪼꪒ꫁ ꪎꪲ꪿ ꪜꪲ ꪜꪱꪥ
- ꪹꪚꪙ ꪒꪱꪉ ꪬꪱꪥ ꪢꪮꪀ ꪹꪢꪥ ꪣꪳꪒ ꪣꪺ ꪝꪱ ꪹꪎ꫁ꪱ
- ꪹꪚ꪿ꪱ ꪔꪾ ꪹꪄ꫁ꪱ ꪒꪳꪚ ꪡ꫁ꪱ ꪹꪋꪷ ꪼꪀ꪿ ꪄꪽ ꪹꪙꪉ
- ꪊꪲ꪿ ꪭꪴ꪿ꪉ ꪹꪭꪉ ꪶꪔ꪿ꪀ ꪒꪲꪙ ꪹꪥꪸꪒ ꪯꪱꪥ ꪫꪱꪉ ꪙ꫁ꪮꪉ
- ꪬꪱꪀ ꪁꪫꪱꪣ ꪎꪰ꪿ꪉ ꪵꪘ꫁ꪙ ꪻꪙ ꪕ꫁ꪮꪉ ꪹꪏ ꪁꪱꪒ ꪼꪢ ꪁꪾ
- ꪵꪣ꪿ ꪹꪯꪸꪣ ꪵꪝꪉ ꪹꪚ꪿ꪱ ꪤꪾ ꪚꪮꪀ ꪮꪺꪙ ꪎ꪿ꪱꪫ ꪹꪭꪙ ꪬꪱ ꪹꪘ꫁ꪱ
- ꪙ꫁ꪮꪉ ꪔꪮꪚ ꪖ꫁ꪮꪥ ꪊꪱ ꪹꪫ꫁ꪱ ꪹꪭꪸ ꪣꪰꪀ ꫛ ꪻꪒ
- ꪹꪝ꪿ ꪹꪮꪱ ꪻꪊ ꪊꪳ꪿ ꪁꪫꪱꪣ ꪯꪱꪥ ꪶꪮ꫁
- ꪼꪅ꫁ ꪙ꫁ꪮꪉ ꪬꪱꪀ ꪶꪄ꫁ ꪬꪱ ꪋꪴ꫁ ꪵꪀꪣ ꪘ꫁ꪱ ꪼꪀ꪿ ꪄꪽ
- ꪑꪱꪣ ꪹꪣ꪿ ꪹꪭꪱ ꪖꪮꪉ ꪀꪽ ꪋꪮꪚ ꪹꪭꪉ ꪹꪚꪙ ꪹꪄ꫁ꪱ
- ꪒꪱꪫ ꪭꪴ꪿ꪉ ꪤ꫁ꪮꪙ ꪹꪏꪉ ꪙꪲ꫁ ꪹꪬꪸꪙ ꪝꪲ꪿ ꪣꪱ ꪖꪮꪉ
- ꪜꪮꪉ ꪫ꪿ꪱ ꪩꪳꪣ ꪎꪸ ꪙ꫁ꪮꪉ ꪹꪮꪱ ꪣꪸ ꪀꪾ꫁ ꪮꪳ꪿ꪙ?
- ꪎꪷ ꪝꪲ꪿ ꪻꪬ꫁ ꪈꪾ꪿ ꪁꪲ꫁ꪫ ꪩꪺꪉ ꪔꪸ꪿ꪀ ꪎꪮꪉ ꪕꪱꪉ
- ꪩꪱꪉ ꪶꪄꪣ ꪭꪳꪙ ꪬꪱꪀ ꪹꪜꪸꪙ ꪵꪔ꪿ ꪵꪙꪙ ꪹꪭꪱ ꪀꪸ꫁ꪫ
- ꪶꪔ꫁ꪙ ꪠꪰꪀ ꪋꪸ꫁ꪫ ꪑꪲꪉ ꪹꪒꪸꪒ ꪀꪱꪥ ꪫꪱꪉ
- ꪁꪫꪱꪣ ꪀꪲꪙ ꪢꪱꪉ ꪀꪾꪚ ꪀꪽ ꪹꪚ꪿ꪱ ꪣꪲ ꪑꪱꪣ ꪹꪎ꫁ꪱ
- ꪹꪚꪙ ꪖꪾ꪿ ꪹꪔ꫁ꪱ ꪀꪱꪥ ꪡ꫁ꪱꪫ ꪹꪏ ꪎꪲ꪿ ꪜꪲ ꪥꪸꪙ
- ꪬꪱꪀ ꪫ꪿ꪱ ꪊꪲꪉ ꪬ꪿ꪮꪙ ꪣꪲ ꪹꪋꪷ ꪖꪲ꫁ꪣ ꪹꪏꪉ ꪼꪢ ꪐꪴ꫁ꪉ ꪒꪮꪒ
- ꪑꪱꪣ ꪹꪣ꪿ ꪯꪱꪥ ꪀꪮꪒ ꪮꪴ꫁ꪣ ꪹꪮꪱ ꪙ꫁ꪮꪉ ꪎꪮꪉ ꪵꪀ꫁ꪣ ꪊꪴꪚ ꪮꪱꪥ
- ꪼꪅ꫁ ꪙꪲ꫁ ꪯꪱꪥ ꪫꪱꪉ ꪙ꫁ꪮꪉ ꪹꪜꪸꪙ ꪏꪳ ꪵꪔ꫁ꪣ ꪔꪮꪚ
- ꪑꪲꪉ ꪶꪕ꫁ꪀ ꪼꪬ꫁ ꪮꪳꪙ ꪹꪎ꪿ ꪋꪮꪙ ꪢꪮꪙ
- ꪵꪔ꪿ ꪫ꪿ꪱ ꪑꪰꪉ ꪹꪎꪉ ꪙ꫁ꪮꪉ ꪹꪜꪸꪙ ꪏꪳ ꪵꪔ꫁ꪣ ꪔꪮꪚ
- ꪹꪚ꪿ꪱ ꪋꪮꪚ ꪘꪰ꫁ꪉ ꪻꪊ ꪋꪴ꫁ ꪁ꪿ꪮꪥ ꪶꪀ꫁ ꪶꪕ ꪒꪲ
- ꪹꪥꪸꪒ ꪻꪊ ꪭꪲ ꪠꪱꪀ ꪎꪳ ꪒ꪿ꪺꪙ ꪣꪱ ꪔꪱꪉ ꪘ꫁ꪱ
- ꪻꪬ꫁ ꪵꪬ꪿ꪉ ꪨ꫁ꪱ ꪮꪺꪙ ꪙ꫁ꪮꪉ ꪄꪮꪉ ꪶꪢ꪿ꪀ ꪑꪲꪉ ꪚꪱꪉ
- ꪭꪱ ꪁꪷ꫁ ꪹꪕꪸꪉ ꪄꪸꪙ ꪎꪱꪙ ꪶꪔ꪿ꪀ ꪶꪩꪉ ꪔꪱ ꪥ꫁ꪮꪥ
- ꪠꪱꪀ ꪄꪮꪒ ꪖ꫁ꪮꪥ ꪁꪫꪱꪣ ꪵꪭ꫁ꪙ ꪬꪱ ꪝꪲ꪿ ꪁꪾ ꪶꪒꪥ ꪭꪱ ꪙꪱ”
- ꪣꪱ ꪊꪰ꪿ꪉ ꪶꪕ ꪹꪖꪷꪉ ꪕ꫁ꪱꪫ ꪀ꪿ꪱꪥ ꪛꪺꪙ ꪵꪉ ꪬꪮꪒ
- ꪩꪸꪙ ꪹꪩ꪿ꪱ ꪹꪬꪸꪙ ꪄꪮꪒ ꪖ꫁ꪮꪥ ꪎꪳ ꪙ꫁ꪮꪉ ꪙꪱꪉ ꪵꪀ꫁ꪫ ꪠꪱꪀ ꪬꪱ
- ꪕ꫁ꪱꪫ ꪁꪷ꫁ ꪔꪱ ꪝꪰꪉ ꪥ꫁ꪮꪥ ꪵꪩ ꪎꪳ ꪕꪽ ꪶꪢ꪿ꪀ:
- “ꪈꪾ꪿ ꪶꪕ꫁ꪀ ꪘꪰ꫁ꪉ ꪀꪺꪉ ꪕ꫁ꪮꪉ ꪯꪱꪥ ꪵꪔ꫁ꪣ ꪔꪮꪚ ꪬꪱ
- ꪨꪱꪥ ꪄꪴ ꪙ꫁ꪮꪉ ꪭꪸꪙ ꪊꪱ ꪵꪘ ꪖꪲ꪿
- ꪙꪱꪉ ꪹꪚꪷ꪿ꪉ ꪘꪰ꫁ꪉ ꪎꪳ ꪙꪲ꫁ ꪹꪚ꪿ꪱ ꪶꪔ꪿ꪀ ꪶꪔ ꪻꪒ
- ꪹꪝ꪿ ꪔꪱ ꪯꪱꪥ ꪶꪔ꪿ꪀ ꪼꪨ ꪎ꪿ꪽ ꪣꪳ ꪒꪰꪉ ꪶꪒ꪿ꪉ
- ꪫ꪿ꪱ ꪈꪾ꪿ ꪵꪔ꫁ꪣ ꪀꪾꪚ ꪥꪾ꫁ꪉ ꪩꪱꪥ ꪶꪁꪒ ꪶꪀꪉ ꪼꪢ
- ꪭꪸꪙ ꪬꪮꪣ ꪵꪩ ꪹꪚꪷ꪿ꪉ ꪼꪜ ꪋ꪿ꪮꪥ ꪯꪱꪥ ꪵꪜꪉ ꪎ꫁ꪮꪣ ꪵꪨ꪿ ꪹꪙꪷ
- ꪼꪅ꫁ ꪙꪲ꫁ ꪯꪱꪥ ꪊꪲ꪿ ꪶꪮ꫁ ꪫꪸꪀ ꪋꪴ꫁ ꪹꪭꪱ ꪄ꫁ꪽ ꪬ꪿ꪱꪉ ꪀꪽ
- ꪹꪚ꪿ꪱ ꪋꪳ꪿ ꪯꪱꪥ ꪜꪽ ꪼꪎ꫁ ꪀꪺꪉ ꪁꪲꪉ ꪎꪮꪉ ꪶꪢ꪿ꪀ
- ꪝꪲ꪿ ꪬꪱꪀ ꪹꪩꪷꪉ ꪶꪕ꫁ꪀ ꪼꪬ꫁ ꪬꪱ ꪙ꫁ꪮꪉ ꪹꪖꪷꪉ ꪘ꫁ꪱ ꪼꪀ꪿ ꪄꪽ
- ꪶꪜꪉ ꪬꪺ ꪻꪊ ꪒꪸꪒ ꪒꪽ ꪻꪎ꪿ ꪙꪱꪉ ꪣꪲ ꪭ꫁ꪺꪥ ꪹꪣ꪿ ꪻꪒ
- ꪔꪱ ꪫ꪿ꪱ ꪚꪴꪙ ꪶꪎ꪿ ꪎ꫁ꪺꪥ ꪣꪲ ꪙ꫁ꪮꪉ ꪔꪱꪥ ꪊꪰ꪿ꪉ ꪶꪩ꪿ꪉ ꪻꪊ ꪭꪱ ꪙꪱ”
- ꪕ꫁ꪱꪫ ꪁꪷ꫁ ꪣꪳ ꪄꪸꪙ ꪶꪣ꫁ꪣ ꪩꪸꪙ ꪚꪱꪥ ꪠꪴꪉ ꪊꪲꪚ
- ꫛ ꪤꪴ꪿ ꪚ꫁ꪱꪙ ꪭꪮꪒ ꪝꪴ꫁ꪙ ꪎꪷ ꪋ꪿ꪮꪥ ꪶꪑꪣ ꪹꪖꪷꪉ
- ꪭꪸꪙ ꪬꪮꪣ ꪹꪬꪸꪙ ꪄꪮꪒ ꪊꪱ ꪋ꪿ꪮꪥ ꪙꪱꪉ ꪻꪊ ꪢ꫁ꪽ
- ꪖ꫁ꪱ ꪠꪸꪒ ꪎ꫁ꪱꪉ ꪕ꪿ꪮꪥ ꪵꪭ꫁ꪙ ꪹꪏꪉ ꪄꪮꪒ ꪹꪏꪸ ꪢꪱꪉ